కత్తితో పొడిచి,గొంతు కోసిన ఘటనపై సమగ్ర విచారణకు డిమాండ్
బాధ్యులను వెంటనే అరెస్టు చేయాలి..బాధితుడికి మెరుగైన వైద్యం అందించాలి
కుటుంబానికి రక్షణ కల్పించాలి:KVPS జిల్లా ప్రధాన కార్యదర్శి పాలడుగు నాగార్జున
ప్రజాసంక్షేమం న్యూస్-నల్లగొండ, సెప్టెంబర్ 23: మాడుగులపల్లి మండలం కుక్కడం గ్రామంలో మంగళవారం రాత్రి వినాయక నిమజ్జన ఊరేగింపు సందర్భంగా దళిత యువకుడు పోతేపాక సాయి కుమార్‌పై దాడి జరిగిన ఘటనపై సమగ్ర విచారణ జరిపి, బాధ్యులుగా తేలిన వారిని వెంటనే అరెస్టు చేయాలని కుల వివక్ష వ్యతిరేక పోరాట సంఘం (KVPS) నల్లగొండ జిల్లా ప్రధాన కార్యదర్శి పాలడుగు నాగార్జున డిమాండ్ చేశారు.బుధవారం నల్లగొండ జిల్లా కేంద్రంలోని ప్రభుత్వ ఆసుపత్రిలో చికిత్స పొందుతున్న సాయి కుమార్‌ను పాలడుగు నాగార్జున, గాదె నరసింహ పరామర్శించారు. అనంతరం నాగార్జున మాట్లాడుతూ.. బాధితుడి వాంగ్మూలం ప్రకారం తండు వరుణ్, పండు వేణు, తండు వెంకన్న, తండు లింగయ్యతో పాటు మరికొందరు వ్యక్తులు దాడికి పాల్పడి, కులం పేరుతో దూషిస్తూ కత్తితో ఎడమ పక్క భాగంలో పొడిచి, గొంతు కోసినట్లు ఆరోపించారు.ఈ ఘటనపై పోలీసులు అన్ని కోణాల్లో సమగ్ర దర్యాప్తు చేసి వాస్తవాలను నిర్ధారించాలని, దర్యాప్తులో నేరం చేసినట్లు తేలిన వారిపై చట్ట ప్రకారం కఠిన చర్యలు తీసుకోవాలని నాగార్జున కోరారు.
ఎస్పీ ప్రత్యేకంగా దృష్టి సారించాలి:
ఘటన తీవ్రతను దృష్టిలో ఉంచుకుని నల్లగొండ జిల్లా ఎస్పీ తక్షణమే జోక్యం చేసుకుని సమగ్ర విచారణకు ఆదేశించాలని డిమాండ్ చేశారు. బాధితుడి వాంగ్మూలం, ప్రత్యక్ష సాక్షుల వివరాలు, అందుబాటులో ఉన్న ఆధారాలను పూర్తిగా పరిశీలించి దర్యాప్తును పారదర్శకంగా నిర్వహించాలని కోరారు.నేరం దర్యాప్తులో నిర్ధారణ అయితే హత్యాయత్నం, ఎస్సీ/ఎస్టీ (అత్యాచారాల నిరోధక) చట్టంలోని వర్తించే నిబంధనలతో పాటు ఇతర వర్తించే చట్టాల కింద చర్యలు తీసుకోవాలని కోరారు.
బాధిత కుటుంబానికి రక్షణ కల్పించాలి:
దాడి నేపథ్యంలో సాయి కుమార్‌తో పాటు ఆయన కుటుంబ సభ్యులకు ఎలాంటి బెదిరింపులు, ఒత్తిళ్లు లేకుండా తక్షణ పోలీసు రక్షణ కల్పించాలని నాగార్జున డిమాండ్ చేశారు. బాధితుడికి మెరుగైన వైద్యం అందించడంతో పాటు ప్రభుత్వ నిబంధనల ప్రకారం అందాల్సిన పరిహారం, సహాయాన్ని అందించేందుకు చర్యలు తీసుకోవాలని కోరారు.కుక్కడం గ్రామంలో పరిస్థితులు ఉద్రిక్తంగా మారకుండా ముందస్తు జాగ్రత్త చర్యలు చేపట్టి, అవసరమైన చోట పోలీస్ పికెట్ ఏర్పాటు చేసి శాంతిభద్రతలను పరిరక్షించాలని విజ్ఞప్తి చేశారు.దళితులు, గిరిజనులపై దాడులు, కులం పేరుతో దూషణలు, బెదిరింపులకు పాల్పడే ఘటనలను అరికట్టేందుకు పోలీసులు కఠిన చర్యలు తీసుకోవాలని పాలడుగు నాగార్జున కోరారు.ఈ కార్యక్రమంలో KVPS జిల్లా సహాయ కార్యదర్శి గాదె నరసింహ, రవీంద్ర కుమార్ తదితరులు పాల్గొన్నారు.
వినాయక ఊరేగింపులో దళిత యువకుడిపై దాడి!
