235 మండలాల్లో వర్షాభావ పరిస్థితులు.. రైతులకు ఉపశమన చర్యలపై చర్చ
హైదరాబాద్, అక్టోబర్ 9 (ప్రజా సంక్షేమం న్యూస్):
తెలంగాణ రాష్ట్రంలో ఎల్‌నినో ప్రభావం, వర్షాభావ పరిస్థితులపై ముఖ్యమంత్రి ఎ. రేవంత్ రెడ్డి ఈ నెల 12న మంత్రులతో ప్రత్యేక సమావేశం నిర్వహించనున్నారు. వర్షపాతం తగ్గిన ప్రాంతాల్లో పరిస్థితులు, రైతులు ఎదుర్కొంటున్న ఇబ్బందులు, తక్షణ ఉపశమన చర్యలపై సమావేశంలో చర్చించనున్నారు.వ్యవసాయం, సాగునీరు, తాగునీటి సరఫరా, విద్యుత్ డిమాండ్ పెరుగుదలతో పాటు ఇతర అత్యవసర అవసరాలపై ప్రధానంగా దృష్టి సారించనున్నారు. రాష్ట్రంలో సాధారణం కంటే 17 శాతం తక్కువ వర్షపాతం నమోదుకాగా, దాదాపు 235 మండలాల్లో వర్షాభావ పరిస్థితులు నెలకొన్నాయి.కరువు ప్రభావిత మండలాలను ప్రకటించి, రాష్ట్రానికి తగిన ఆర్థిక సాయం అందించాలని కేంద్ర ప్రభుత్వాన్ని ఇప్పటికే రాష్ట్ర ప్రభుత్వం కోరింది. ఇందుకోసం రూ.20 వేల కోట్ల ప్రత్యేక ప్యాకేజీ కేటాయించాలని విజ్ఞప్తి చేసింది.వర్షాభావ ప్రాంతాల్లో చేపట్టాల్సిన సహాయక చర్యలు, మంత్రివర్గ ఉపసంఘం రూపొందించిన కార్యాచరణ ప్రణాళికతో పాటు అఖిలపక్ష సమావేశం, రైతు సంఘాలు, వివిధ రంగాల నిపుణుల సూచనలను ఈ సమావేశంలో చర్చించే అవకాశం ఉంది. రైతులకు ఉపశమనం కల్పించడంతో పాటు వ్యవసాయం, నీటి వనరుల నిర్వహణకు సంబంధించి తీసుకోవాల్సిన చర్యలపై ప్రభుత్వం దృష్టి సారించనుంది.
ఎల్‌నినో ప్రభావంపై ఈ నెల 12న సీఎం ప్రత్యేక సమావేశం
RELATED ARTICLES
