20 వేల మెగావాట్లకు చేరిన విద్యుత్ డిమాండ్
జలవిద్యుత్ తగ్గినా ప్రత్యామ్నాయ వనరులతో సరఫరా
నీటిని పొదుపుగా వినియోగించాలి:భట్టి విక్రమార్క
ప్రజాసంక్షేమం న్యూస్ పులిచింతల: పులిచింతల జలవిద్యుత్ ఉత్పత్తి కేంద్రాన్ని ఉప ముఖ్యమంత్రి, విద్యుత్ శాఖ మంత్రి మల్లు భట్టి విక్రమార్క సందర్శించారు. సహచర మంత్రి ఉత్తమ్ కుమార్ రెడ్డితో కలిసి విద్యుత్ ఉత్పత్తి, సరఫరాపై అధికారులతో సమీక్ష నిర్వహించారు.రాష్ట్రంలో విద్యుత్ డిమాండ్ రికార్డు స్థాయిలో దాదాపు 20,000 మెగావాట్లకు చేరినప్పటికీ, ఎక్కడా అంతరాయం లేకుండా నిరంతర విద్యుత్ సరఫరా అందిస్తున్నామని భట్టి విక్రమార్క తెలిపారు. ఎల్‌నినో ప్రభావంతో వర్షాభావ పరిస్థితుల కారణంగా జలవిద్యుత్ ఉత్పత్తి తగ్గినప్పటికీ, థర్మల్ పవర్‌తో పాటు ఇతర ప్రత్యామ్నాయ వనరులను పూర్తిస్థాయిలో వినియోగిస్తున్నామని చెప్పారు.ప్రజల అవసరాలను దృష్టిలో ఉంచుకుని విద్యుత్ సరఫరాలో ఎలాంటి ఇబ్బందులు తలెత్తకుండా అధికారులు సమన్వయంతో పనిచేయాలని సూచించారు.అదేవిధంగా తాగునీటి అవసరాలకు తొలి ప్రాధాన్యత ఇస్తున్న నేపథ్యంలో అందుబాటులో ఉన్న నీటి వనరులను ప్రజలంతా పొదుపుగా వినియోగించుకోవాలని భట్టి విక్రమార్క విజ్ఞప్తి చేశారు.
రికార్డు స్థాయిలో విద్యుత్ డిమాండ్.. నిరంతర సరఫరా
